احنا ارجل من دول

بقالي فتره من ساعة ماتش مصر وزامبيا والجمهور ابن الزامبيا مش عايز يسكت كان الماتش بعد بكره وكل اللي طلع على شوية البني ادمين السيس مش عايزين بنات عايزين وحوش

على اساس اني يعني اننا بنروح الاستاد بقمصان النوم ولا ايه يعني ما كل واحد يلم لسانه وعلى فكره

احنا ارجل من الشاب اللي رايح الاستاد يحكها

احنا ارجل من الراجل اللي جايب مراته وعياله يقزقزوا لب

احنا ارجل من العيال اللي بتيجي تتصور سبعميت صوره وبعد كل جون

احنا ارجل من الناس اللي بتيجي ومعاها بنات ويقضوها زي العيال بتوع الكورنيش

احنا ارجل من بتوع الالتراس اللي بيشتموا اي بني ادم وخلاص لله فلله

احنا ارجل من اللاعيبه اللي بتلعب ماتش اه وعشره لأ وهم سبب الوكسه دي

احنا ارجل من اي حد وصدقوني لو كنت في مصر لا كنت خدت اصحابي البنات زي كل مره وروحنا الاستاد وشجعنا لاخر نفس وماكانش هايمنعني عن الاستاد اكبر دكر فيكي يا جمهورية مصر العربيه .

ال عايزين وحوش ال

هم يعني البنات هم السبب ان التشجيع وحش

طيب هو اصلا الاستاد كله بيبقا فيه كام بنت .. نسبتهم كام يعني عشان يبقفوا هم اللي بيعطلوا التشجيع

اصدقائي الولاد الرجاله والاتراس وكل الناس الحلوه .. ماتزعلوش مني بس صدقوني احنا من حقنا نروح الاستاد وطظ في اي حد مش عايز بنات تروح الاستاد على اساس يعني ان الاستاد ده امه هي اللي جايباهوله

احترموا نفسكوا بدل ما ارجعلكوا مصر

بيب بيب

اولا خطوبتي بكره

:D

ويا دبلة الخطوفه عقبالكوا كلكوا

وان شاء الله لينا عوده بعد الخطوبه كده باذن الله .. بس يارب تكونوا انتوا لسه عايشين وماحدش يتحرك من مكانه

المكان كله محاصر انا باقول اهو

اه ملحوظه

الحمد لله مستمره مع الفريق

والحمد لله الحمد لله الحمد لله يعني ..... مابنكسبش الا كل فين وفين .... انا بدات اكره الكوره من البت اللي بتقف جون .. البت يا اخواتي كل شويه تبص على ام صاحبها ونتلزق جون .. اول حارسة مرمرى يتشاط عليها فاول تروح الناحيه التانيه .. فاكراه بنلتي .. البت بتتوقع الفاوي يا ناس

هاتشل

هارجعلكوا برجل واحده

بس احم احم . اه .. رغم اني اصلا ديفندر

بس انا هداف الفريق برصيد 10 اجوان في 14 ماتش

واحنا دلوقت مركزنا ال 6 من 11 وبيصعد اول فرقتين بس

قولوا يارب ده احنا حتى في رمضان

وبالمناسبه بقا يعني

انا قربت اخلص القرآن .. شدوا حيكوا

حبايبي

كم افتقد تعليقاتكوا وقراية مواضيعكوا الجميله اوي اوي اوي

ولكن

طلعان عين امي شامي وبلدي علي راي زيكا ( عشان لو طلعت كلمه ابيحه يبقي هو المسؤل )

انا باتمرن مرتين في اليوم

وباروح الشغل - اكل العيش مر يا اخواننا - والرزق يحب الخفيه وقربي يا مدام . قرب يا بيييه

عموما

مش لاقيه حاجه اقولها غير انكوا واحشني جدا وفيه مليون حاجه عايزه اكتب فيها بس مش لاقيه وقت

وعموما انا دلوقت مش في السويد انا سافرت اسكتلندا عندي ماتش وهارجع بعد يومين بالعدد والماتش عندي كمان ساعه ونص وفاضل حبه وانزل التمرين ادعولي بالتوفيق

وان شاء الله هاتسمعوا خبر كويس شخصي ليا

وخليها مفاجاه بقي

مهما روحنا ومهما جينا

الاول كده حمدالله علي سلامتي .. الله يسلمكوا شكرا شكرا

انا اسفه جدا اني غايبه طول الفتره دي بس مش بمزاجي ده كان غصم واقتدار امتحانات وشغل وسفر للجزائر ( ابقوا فكروني احكيلكوا عاللي حصل اليوم ده ) وكمان تمرينات عشان انا اتعاقدت مع نادي درجه تانيه ف السويد عشان العب كوره زي مانتم عارفين

وطبعا مش لاقيه وقت افكر حتي

بس انا هادخل من وقت للتاني اشقر علي حبايبي الحلوين الامامير المدونين

وسمعني احلي سلام يا جدع للمدونين

================

بعد شغل الاتحاد الاشتراكي اللي فوق ده انا ليا تعليق محبوس في زوري ونفسي اكح ويطلع

الناس كلها سايبين الموضوع الاساسي ان احنا اتطرقعنا من امريكا , وكلهم بيتكلموا علي اللاعيبه كان معاهم بنات في الاوض ولا لأ. ماهو حاجه من الاتنين يا اما الناس دي جابت بنات فعلا وكانوا بيلعبوا علي ركبهم يا اما ماجابوش . وباارضه كانوا بيلعبوا علي ركبهم وباستثناء الحكم الاولاني انهم جابوا بنات يبقي ايه السبب التاني اللي خلاهم بالمنظر ده حد يقولي بس ماحدش يتعصب

ضل موزه ولا ضل حيطه..ممدوح زيكا

زمان في سالف العصر والاوان . كان يا مكان في بلد من البلدان ... . كان الجواز مش زي دلوقت . لا لا لا خالص . كانت البنت هي اللي بتروح تتقدم للولد وتطلب ايده من ابوه , انا بقي كنت عايش في الزمن ده

في يوم من ذات الايام وانا ماشي في الشارع وراجع من الشغل لقيت صوت واحده بتبسبس بسست بسست

عوجت راسي كده لقيت واحده بتقولي " ايه يا موز الحلاوه دي "

انا كانوا قايلنلي في البيت لو حد عاكسك ما تردش عليه عشان كده ماردتش وعملت نفسي ماخدتش بالي ومشيت

لقيت صوت البسبسه رجع تاني

بسست بسست

عوجت راسي تاني ( وماعرفش ليه رغم اني عارف ان ده نفس الصوت ونفس البت اللي بتعاكس )

لقيتها بتقولي " ايه يا موز خدت علي خاطرك مني ليه .. ده انا غرضي شريف "

- لو انتي غرضك شريف فعلا تعالي اطلبيني من بيتنا مش تعاكسيني كده في الشارع . ايه ماعندكيش اخوات صبيان .. هو انا اخلص من البنات اللي بيتحرشوا بيا في الميكروباصات والمترو ,, الاقي واحده تعاكسني . لا وكمان في شارعنا

فاتت ايام وكل يوم بارجع من الشغل باتلكع في نفس المكان علي امل اني اسمع صوت البسبسه تاني لكن للاسف بدون فايده

لحد ما في يوم بابا قاللي

ان في واحده جايبه اهلها النهرده تطلب ايدك مني .. قلت ايه

- اللي تشوفه يا بابا

حط بابا ايده علي كتفي وقاللي فعلا انا عرفت اربي

وجه اليوم الموعود

وجت العروسه وجابت امها وابوها وقعدنا في الصالون وبعد الكلام والنحنحه

بدا ابويا بالكلام

شوفي يا بنتي . احنا مش بيهمنا الماديات والكلام الفاضي ده احنا " بنشتري موزه " وانا يوم ما اقول لابني يا جواز لازم اختارله الست اللي تحافظ عليه و بارضه أأمنله مستقبله وانتي عارفه الشباب دلوقت لقطه والعرايس بتترمي . وياما بيجيلنا بنات ولاد ناس وبنرفضهم والمطلوب

- لكن يا عمي . انا شوفت ابنك في وبصراحه الناس كلها بتتكلم عنه بكل خير وده اللي شجعني عشان اجي اطلب ايده قلت ايه يا عمي اخلص مش فاضينلك احنا

- شوفي يا بنتي

- لا يا عم اشوف ايه كفاياك رغي ها .. وافقت ولا لأ ؟

- هححح علي بركة الله نقرا الفاتحه

فاتحة ايه يعم انت احنا مسيحيين . .. الراجل ده عبيط ولا ايه

طب ايه بيقروا ايه المسيحيين ؟

مش مهم يا عمي خلاص من غير ما نقرا . هنكتب الكتاب امتي ؟

كتاب مين يا بنتي احنا مسيحيين ما بنكتبش كتب

- اه تصدق يا عمي كلامك صح

وسط كل الدوشه دي انا صرخت

اااااييييهيه هو ده . ومين قالكوا ان انا وافقت اصلا , انتوا عمالين تقولوا حاجات غريبه من اول القعده

يعني مين قال مثلا اني وافقت . او مين قال اننا مسيحيين اصلا ايه الجنان ده

ثم ان انا يا بابا وافقت علي المقابله مش الجواز , انا بحب واحده تاانيه ولا يمكن اتجوز واحده غيرها ابدا

فجاه علامة الصلاه اللي علي وش ابويا راحت والنور اللي في وشه ضلم وقالي . ولد .. اخرس . ادخل علي اوضتك

وانتهي الموضوع علي كده

وبالليل وانا بكلم الموزه . قلتلها بقولك ايه

انا كذا عروسه جت واتقدمتلي وآخرهم النهرده وانا مش هاقدر ارفض عرايس اكتر من كده , ابويا بدا يشك اني حامل ..وانا عايز اسمع منك قرار دلوقت ومعاد تيجي تقابلي فيه بابا

- ايوه لكن انا قلتلك ميت مره , انا قدامي كتير اوي عشان اكون نفسي وانت وافقت علي كده , وبعدين انا بصراحه بقي جالي عقد عمل في الكويت وهسافر ولما ارجع يبقي ربنا يسهل وانا آسفه جدا . بس انا ماوعدتكش بحاجه

وقفلت السكه في وشي

انا اتحطمت جدا ومن ساعتها وانا بادور علي عروسه . واتاكدلي المثل اللي بيقول فعلا " ضل موزه ولا ضل حيطه " وهو يعني الراجل مننا ليه ايه غير بيته وعياله

لحد الحمد لله ما ربنا كرمني ببنت الحلال وكلكم معزومين علي الفرح ان شاء الله

وعقبال عندكم

تنويه

نزلت البوست عند زيكا

وادي اللينك اهو

http://www.adirector.blogspot.com/

انا تاج

انا لبست التاج ده من عند ساره نجاتي ولو اني مش بحب التاجات بس دي ساره يعني ( بتلعب كاراتيه ) وانا بلعب بلياردو ومايهمنيش اي حد نياهاهاهاها

اسمك ؟.
اسماء محمد مازن عوني

- المشهور بيه وسط أصحابك ؟.
سوكا وماحدش يقوله عشان ماضربوش .. وكمان الكابتن وسامو وسيمو اي حاجه عالوزن تحبوها

- مجال دراستك ؟.

تجاره ان شاء الله . ليه هه ليه ؟ هه ليه ليه؟ بتسال ليه هه ؟

اسم مدونتك ؟.
ماهو مكتوب اهو ولا الباشا بيفك الخط

- صورتك الرمزية بتعبر عن ايه ؟.
دي ميني ماتعرفوهاش ؟ مش بتعبر عن اي حاجه خالص خالص

- هل فكرت باغلاق مدونتك ؟ و السبب ؟
لا ومش هاقفلها .. قاعده انا علي نافوخكوا كده ليل نهار ال اغلاق المدونه ال

- ايه رد فعلك لو حد قل أدبه فى التعليق ؟.
علي حسب بس عادي يعني انا الحمد لله اعرف ارد كويس وربنا خلقلي لساني اطول من دراعي

- أسوأ مدونة ؟.
هم عارفين نفسهم

- هيحصل ايه للميل بعد ما تموت ؟.
يعني انتوا هاممكوا الميل ومش هاممكوا اني هاتنيل اموت ما يتحرق الميل

- اديت الباس وورد لحد قبل كده ؟
اه . ليه بقي السؤال الإتم ده

- السفر بالنسبة لك ايه ؟
يالهويتيييي ده سؤال . السفر بالنسبالي زي اللبن الصبح بالنسبه للعيال الصغيرين انا تقريبا لو ماسافرتش هابقي مقطوعه من شجره.

- المود بتاعك ايه ؟.
باستعبط

- بتعمل ايه وقت فراغك ؟.
باكمل استعباط

- الصفات اللى خدتها من والدك ؟.
هو انا مالحقتش اخد منه حاجه . بس الله يرحمه يعني كان جرئ وكان بيحب اصحابه .. مي توو

-الصفات اللى أخدتها من والدتك ؟.
مالحقتش بارضه ماتت في نفس اليوم هي وابويا , بس الوليه كانت طيبه وانا طيبه والله مش شريره اوي يعني ساعات ببقي كويسه يعني

- اكتر حاجات بتكرهم ؟.
الغربه , الوحده , الرخامه , قلة الذوق , الخيانه , النداله , الغرور , التكبر , الفشل , السمك

- أكتر حاجات بتحبهم ؟.
اصحابي .,. اصحابي ... اصحابي .. اصحابي ... الاهلي .. تررم .. مصر

- شخصيتك نوعها ايه ؟.
اخضر وباستك من فوق

- لماذا دخلت عالم التدوين ؟.
اصلي لقيت عالم البحار مقفول قلت ادخل هنا اريح علي بال ما يفتح

- أجمل جملة بتتقال فى وصف مدونتك ؟.
والله فيه ناس فللي كتير بتقول كلام حلو زيها

-أحلى بوست كتبته ؟.
في رايي الشخصي ( بابا بابا يعني ايه لولب )

- أفضل مدونة قريتها ؟.
زيكا ( المخرج - الاشعاريزم ) .. ساره نجاتي ... الصباغ ,, ماجي , آبي , ايمي , ست الحسن , مياسي , تشي ( عمرو ) , مايكليتو , وغيرهم كتير جدا بس دول اللي افتكرتهم

أفضل بوست قريته ؟.
انا بحب بوست ( عندما قابلت الشيطان ) عند زيكا وكمان اشعار زيكا بتعملي حاله حلوه اوي لما بقراها

- الشغل بالنسبة لك ؟.
ادمان

- الانترنت بالنسبة لك ايه ؟.
التواصل مع الناس اللي ربنا ما ارادليش اني ابقي جمبهم

- تمرر التاج لمين ؟.
لا يا عم اللي مارضاهوش علي نفسي ماضراهوش علي غري لكن لو اي حد عايز ياخده . يتفضل

ميه مسا يا معلمين .. بارضه احب افكركوا ان البوست الجاي بتاعي هتقروه عند زيكا والبوست بتاع زيكا هتقروه عندي