من الآخر

اتكلمنا كتير في موضوع المعاكسات وسبعميت مقال وربعميت جرنال وستين الف حمله وبتاع سبعتاشر مظاهره و مئات من القضايا وكل ده ولسه بارضه بنتكلم

وعشان ننجز في الحوار ده عشان مابحبش الرغي

اي تبرير للتحرش بلبس البنت مرفوض في اي مناقشه عن التحرش الجنسي

بدل ما تشوفوا البنت بتلبس ايه روحوا شوفوا المتحرشين دول بيفكروا ازاي وعالجوهم بقي احبسوهم دي مش مشكلتنا

انا بلبس اللي انا عاوزاه في اي حته في العالم وماحدش بيقولي انتي بتعملي ايه

مش هاقول السويد ولا امريكا ولا اي بتنجانه من دول

لا الاردن

لبنان

تونس

ماهي كل دي بلاد عربيه وكل دي دول مش غنيه زينا وكل دول عندهم ظروف اقتصاديه زي الزفت وبالذات لبنان يبقي اشمعنا ليه بتعرض للمضايقات في مصر اكتر من اي حته تانيه

ماحدش يتكلم عن لبس البنات عشان مايجيليش شلل .. وماحدش يدخل يقولي الحجاب والكلام ده انا باشوف بام عين اللي خلفوني محجبات بيتعاكسوا وساعات اكتر مننا ( كغير محجبات ) مش شاب معقد نفسيا ومتخلف عنده مرض هو اللي هيحددلي البس ايه ومالبسش ايه

وبااااااااااااااااااااارضه ماحدش يدخلني في فرضية الحجاب والكلام ده ومش عايزه حد يناقشني فيه ,

الحجاب فرض مش هنأول كلام ربنا ومش هنتكسف من ديننا , لكن بارضه يعني طب بالنسبه للمسيحيين يعملوا ايه

ماهو الحجاب عندهم مش فرض يعملوا ايه

وبعدين بلاش المسيحيين خليني في نفسي

وبلاش نتكلم في الدين اصلا

وبعدين انا لسه قاريه موضوع عن واحده عندها 40 سنه وبتتعاكس واتعرضت لمضايقات وهي مدونه

40 سنه يا بني ادمين يعني اصغر من مرات ابويا بسنتين طيب يعني ممكن يكون اللي عاكسها ده قد ابنها مثلا

وبعدين معلش يعني نرجع نخلينا في لبس البنات وعلاقته بالتحرش

معني كده يعني اني لما اشوف راجل عاجبني اروح ابوسه ولا ايه مش فاهمه , لو مثلا واحد امور حبتين اروح انا المسه من اماكن حساسه ( وماحدش يفهمني غلط بحساسه دي ) .. ماهو انتوا ما تنرفزونيش وبعد كده تقولولي عيب انتي بنت ,

هل مطلوب مني اني امشي في الشارع لابسه الدولاب كله عشان الباشا اللي هيتحرش بيا ولا يعاكسني يحس علي دم امه ومايعاكسنيش

ولو عاكسني الناس تقول . لا صح عنده حق شوفوا البت الصايعه قليلة الادب دي لابسه ايه وشوفوا الواد الغلبان المحروم يا عيني راح اتحرش بيها الغلبان . من قهرته

احا يا مصريين انتوا هتجننوني يعني ولا ايه مش فاهمه

هو مين الجاني ومين المجني عليه ؟؟؟؟؟؟؟؟؟؟؟؟؟؟؟؟

ماهو حاجه من الاتنين يا اما المجتمع يجرم التحرش ومش قصدي القضاء لا المجتمع ذات نفسه هو اللي يرفض ده ويعتبره خروج عن الادب والناس تبص بقرف لما واحد يعاكس واحده مش يصقفوله ويضحكوله ويزغرطوله كمان

يا اما الستات تقعد في بيوتها بقي

خلينا قاعدين في بيوتنا احسن

بصوا انا عارفه اني صعب اتعاكس لان يبقي نهار امه زي وشه وليلة اللي خلفوه طين لو فكر بس يضايقني ولا حتي تيجي الفكره علي دماغه انا الحمد لله باعرف ارجع لاصلي اللي هو حي الهرم العظيم كويس اوي سواء في مصر او بره مصر

بس يا جدعان اللي هيجنني ان الناس بتدي تبريرات للشاب اللي بيعمل كده ودي مصيبه اكبر من مصيبة التحرش

يعني التحرش موجود في كل الدنيا

لكن لما في بلدنا بقي البلد الوحيد اللي تدافع عن ده وتلاقي الناس متعاطفه معاهم تبقي البلد باظت

واظاهر كده اني لما سبت مصر البلد باظت فعلا وربنا لارجع واظبطكوا يا شعب مصر انتوا ... انتوا مايمشيش معاكم غير واحده بلطجيه زيي كده

اوووفففف دي حاجه تقرف

اه ملحوظه اخيره . بمناسبة التحرش

اقروا المقال ده عند عاشقه وغلبانه ( حاجه كده في الجون ) وهاتها من الشبكه ياللي بتدافع عن التحرش

http://ashaweghalbana.blogspot.com/2009/03/blog-post_11.html