عيد الام وحاجات تانيه

الله يرحمك يا ماما , كنتي ام جميله اوي بس للاسف يا حبيبتي مالحقناش نطول مع بعض ونعد نحكي زي ما الامهات ما بتعمل مع بناتها بتعمل مع بعض اخرنا كان نتفرج عالكارتون نلعب كوره سوا تقعدي تهزايني علي الكوره شويتين , بس انا كنت بموت فيكي ولسه بموت فيكي ووحشتيني جدا وعلي فكره بقي انا عاوزه اعترفلك في اعتراف

انا دلوقت بلعب كوره اكتر من الاول هع هعععع

فعلا انا مش عارفه ازاي الواحد ممكن يعيش من غير ام

وطبعا بمناسبة عيد الام ده احب اوضح حاجه العسل اللي في الصوره دي مش امي .. لع . دي مرات ابويا

وده بقي الجزء التاني من حلقة النهارده

امي التانيه والقبل الاخيره والاخيره

مش عارفه هاقولك ايه

الكلام عليكي مش كفايه , لو هاقعد اوصف فيكي وفي حنيتك وفي حبك لينا انا واخواتي مش هاعرف اديلك حقك

ماحدش اصلا هيعرف يديكي حقك في الدنيا

انتي هتاخدي حقك في الجنه لانك تستاهليها

يارب يخليكي ليا

ويطول في عمرك

ومايحرمنيش منك ابدا ويرجعني بالسلامه مش عشان خاطر الشعب وكده لا لا لا

الشعب جمبك ايه بس

انا نفسي ارجع عشان ابوسك واحضنك وبس

وكل سنه وانتي طيبه يا احلي ام في الدنيا

اه ملحوظه ونقول كمان : الصوره لايمان اللي هي مرات ابويا والنص بني ادمه اللي طافحه في الصوره دي تبقي انا اينعم باين مني مناخير وعينين وبس وكفايه اوي كده

يوووووووه نسيت

اه ملحوظه كمان

انا اسفه اني مش بدخل عندكوا ولا بعلق ولا برد حتي علي تعليقاتكم هنا وربنا يخليكوا ليا بقي عارفه مش هتزعلوا عشان انا عندي شغل كتير بطريقه غبيه وفاكرين المدير بتاعي اللي بيرخم عليا مضطهدني ومديني انا الشغل كله بس ياللا قشطه وربنا لاوريه

يخرب بيت الزهيمر يا جدعاااان

كمان ملحوظه واخر ملحوظه والله

فاكرين الواد اللي عماله احارب عشان يحس باللي خلفوني

ايوه هو المدعو ( تررم ) لزوم عدم التسييح يعني

الواد ده بقي ايه حس وال ايه طلع بيحبني كمان ياما انت كريم يارب

فانا من هذا المزنق بقوله

ربنا يخليك ليا انت كمان

وبس بقي كفايه رغي